مقتطفات من انتاج الشعراء الشباب المبدعين:
جديــــــد:
التاه ولد ابته
حَـــــرَّمْ يَاللهْ أعْلَ جــلِّ حَرْ السَّــــــعِير آنَ ولِّ
يبْغِينِ، وَاحْبَابِ، وَاهْـلِ واجْمِيعْ الْمسْلِمِينْ آمِينْ
(آمِينْ اللَّهُمَّ صَــــــــلِّي عَلَى سَيِّدِ الْمُرْسَــــلِينْ)
بكين ولد المبروك:
ميدان التحرير الثــــــوار كل ليله فيه ؤكل انهار
تظاهر واتزارك لحجــار وافديكه هي وابوليس
ؤفالجزيره تنبث اخبــــار النهب ؤلكتيل ؤلحبيس
واعطاو انهارات افحصار الرئيس ؤطاح الرئيس
يغير امعان نحن فالـــدار طفله محتله دار ابليس
لجات الثـــــوار ؤجمعت قوته للضغط ؤلعفيس
نكريه بعـــــــد إلا كلعت من ذيك الطفله دار ابليس
محمد سالم ولد حوبه:
زين فالحك ابلا انــزاع لحفيره واسواكيــــــــه
واخظارانخلــه واذراع ألِ مزكنــنْ بيـــــــــــه
يوم امنجان امرودنيــن كان والناس امكيطنين
وأوهام الظلعه سايليــن ولِ فـــــــــم إماتيـــــهَ
من لمسارب متكرنيــن فيــــه السيول أظيــــه
فيــه لراش امدلييــــــن للِ يختيـــــر إجيــــــه
زينَ...
لحفير والحسيان أشـــوم والجام امطليش إمن فـــم
والظلع والواد ال إكــوم من فــــم إلــود أيسكـــــمْ
نافد لكرار نعرف بيـــن هاذ لماضع لكياطيــــــــن
فالصيف أدنداج البطيـن الناس التنكاس التفهـــــــم
قيمت لمدافع فم امنيـــن لخبيط الشاره يشنكــــــــم
واشماذ يطراو اماكيــن والنخيل الزين امعــــــرم
فالواد اكمام ملكييــــــن واهل فم اتجيه اتــــــزمم
هاذ زين أزين أدّاكيــن نخل العوج كد المكســــم
أزينين إشنيارن لثنيــن وأمطليش الجاي امزنكـم
ولعاد افلماضع زيــــن هاذ لماضع فيهــــــــم تم
لحفيره...
باركلل ولد دداه:
كان كط أفكعتك فالرد مان عالم يل نقصـــــد
ولل لحكلك في حـــــد ش ما راد كط الخلاك
وجلجت ضامنلك بعد عن بردت في لخــلاك
وله أيضا:
أحبيبي طيهْ ابــلا اعنـاد ربِّ وكتنك زاد كْـــادْ
كْد المراد الهون عـــــاد يتمنـالي يالعــــــــــالِ
كامل واعـدويَ طيه زاد كْـــــد أل يتمــــنـــــالِ
وله أيضا:
فكْدك عاد امكْيم لبـريـــــح فالبال ؤعاد إبان اشحيح
وسْقامك عادت بالتصـريح افبـــاركــلل تـَـتْهـــــــلل
وسْقام الغيرك زاد اطِّـــيحْ اكْـــلاص أعلَى باركـلل
محمد الامين ولد احمد ديه
أل فيـــــه اخلكـت ، ؤناغيـت وتحابيـــــــت ،ؤفيـــــه اتواطيت
واعل عرظ وطـول اتمشيـت فيـــــــه امع عتــــــــرت كماني
ول فيـــه اعل حسن-اربيــت- الخلـــــــق ، ؤلاكــــــط انســان
من سغري حـاضنّ، وكريـت فيـــــه ، ؤلا كظـــظ من شـــان
واسكان من عـزت -وارويت- كــــواني ..حـــــــــامد كـــــوانِ
ول فرحـــــــــان إلا غنيـــت اعليــــــــه.. ألا مــــــوريتـــــان
بيت الديـن، ؤلخــلاق، ؤبيت الخيــــــم، ؤبيـــــــــت المعــــانِ
مورتــــــان نبغيـــه ؤفيــــه اجبــــرت أمـــــــاني وحســـان
وبروحـــي نفديــه ؤخـاطيه مانسميــــه ابطــــرف الســــان
ؤمورتــاني ماكـط اعمــاش عن شي زيــن، ولاكط اطراش
واعل زيـن اسمعن ينتـــاش من خــد الدنــــــــي لكصــــان
فالعلـــم ابروكـُ تنكــــــراش ؤراصـو فالشعـــــــر الفوكــان
- وامع كصف الحال- أفكراش افـــلمـــــرو كــــــانك عــــانِ
ويـــل جـاه الخاطر نيمــاش ينــس فيــــه انُ بـــــــــــرانِ
مَخــــلاه ابلــد تيــــــــفلاش للي مــــــــــاشي ول هــــــان
ؤعـاشت وذنُ فالمجد،ؤعاش مورتـــــان مالــــو ثــــــــــان
ؤلانحتـــاج - الذاك - التنباش كافيــــن كولِ بالســــــــــــانِ:
مورتــــــان نبغيـــه ؤفيـــــه اجبــــرت أمـــــــاني وحسـان
وبروحـــي نفديــه ؤخـاطيـه مانسميــــه ابطــــرف الســان
وله أيضا:
عليك الا يمتـــــــــــــــــــان عطب الريم ، ومنهــــــــــان
يالعكل..وفـــــات ازمـــــان مـــــاريت الذاك - اطبيــب -
من لعطيـــــــــــب، ولا بان اطبيـــــــــب الذ لعطيـــــب
كــــون الريــــم .. أومنـــه مــــــــــالك لعد امسيليـــب!!
وتمابيتــــــــــــــــــك عنــه كيــــف "اتمابيــــــت الذيب"
